3B

Kanser sa Suso. Stage 3B. Sakit na dumapo sa paborito kong pinsan. Di kaagad ako nakabisita dahil parati akong may sakit – sore eyes, sore throat, cough, colds. Lintek kasi ng panahon. Pabagu-bago.

Nagkaroon ako ng oras para bisitahin siya kagabi. Dinala ko na rin ang mga regalo para sa mga anak niya. Kung may suot na bonnet, di mo akalain na may sakit na kanser si pinsan. Malusog pa rin. Tumaba pa nga ng konti. Pero pag tinanggal na ang takip sa ulo niya, dun mo na mapapansin na halos kalbo na siya.

Totoo pala yung nakikita sa tv at sine. Yung kakaunti na lang ang buhok sa ulo. Kakarampot na lang. Parang spiky hair. May parte na konti na lang. May parte na madami pa.

Nagulat ako nung nakita ko si pinsan na halos kalbo na. Pero di ko pinahalata. Kagaya pa rin ng dati ang pakikitungo ko. Nag-kwentuhan kami kung paano niya na-diskubre ang bukol sa suso niya. Ang chemotherapy at stem cell sessions niya. At ang mga anak niya.

Malungkot ang Pasko ko dahil sa sakit niya at sa iba pang personal na isyu na sa akin na lang muna. But I try to look at the brighter side of things. Di pa kumalat ang kanser sa ibang parte ng katawan niya. She still has a fighting chance to beat the crap out of the Big C.